ყოველდღიურად ვხვდებით ადამიანებს, რომლებიც განათლებული პიროვნებების შთაბეჭდილებას ტოვებენ. რა თქმა უნდა, ზოგი ნამდვილად ერუდირებულია, მაგრამ არა ყველა. ჩემი გამოცდილებიდან, “განათლებული” პიროვნებების 90% არიან მხოლოდ მოჩვენებითი ინტელექტუალები, რომლებიც იაფფასიან ხრიკებს იყენებენ რეიტინგის ასამაღლებლად.
არსებობს ბევრი საშუალება, ხალხს თავი მოაჩვენო, მაგრამ ამ ყველაფერსაც დიდი მოხერხება ჭირდება. აი, რამოდენიმე მათგანი :
1.) თუ გინდათ, რომ უფრო განათლებული გამოჩნდეთ, ისაუბრეთ წიგნებზე, ისეთ წიგნებზე, რომლებიც წაკითხული არ გაქვთ (თუ ჯერ თქვენს წაკითხულ წიგნზე მოყვებით და შემდეგ ისეთზე, რომლის შინაარსიც კი არ იცით, აუცილებლად შეგამჩნევენ ყალბ მანერებს). თუ გკითხავენ რამეს მოყოლილის შესახებ, აუცილებელია წარმოდგენა მაინც იქონიოთ, თუ რა მოქმედებები ვითარდება მოცემულ წიგნში (ამისთვის საჭიროა პირველი და ბოლო 2-2 ან 3-3 გვერდი გქონდეთ გადაკითხული).
2.) გამოიყენეთ სიტყვები, რომლებიც ლექსიკაში გამოყენებას მოკლებულია. თუნდაც “ექსტრავაგანტული”, “ერუდირებული” და ა.შ. შეიძლება ბევრისთვის ნაცნობი იყოს, მაგრამ საკმაო ეფექტს ახდენს მოსაუბრეზე. რაც მთავარია, ეს ყველაფერი ისე უნდა წარმოთქვათ, რომ მომავალი კითხვები თავიდან აირიდოთ, რადგან თუ ნერვიულობას შეგატყობენ ხმაზე, აუცილებლად გაუჩნდებათ სურვილი, რომ სიტყვაზე “გამოგეკიდონ”.
3.) მოიყვანეთ ცნობილი ადამიანის ფრაზები. მთავარია, სიტუაციას შეეფერებოდეს. შესაძლებელია თქვენით შეთხზათ პატარა წინადადება და ვინმე ცნობილ პოლიტიკოსს ან პოეტს მიაწეროთ.
ეს ყველაფერი არის ზარმაცი ადამიანებისთვის, ჭეშმარიტად ერუდირებულ ადამიანს ამგვარი ხრიკები რაღა თქმა უნდა არ ჩვევია.